كلمات أنشودة لا تشغل البال - مشاري العفاسي

 كلمات أنشودة لا تشغل البال(تأملات) - مشاري العفاسي

لا تشغل البال بالدِّنيا تدَبِّرها

اللهْ المدَبِّر ويعلَم خافي احوالكْ

نَفسكْ علىَ الجُود والمعروف صبِّرها

والجَأْ لرَبِّكْ تشوف الخير يبرالك

الاقدار ما أحَّدْ ياغير اللهْ يقَدِّرها

الأمر أمرَه فلا يجي شَك في بالك

سيرَتكْ بالطِّيب واهلْ الطِّيب عطِّرها

وإذا تبا يطِيْب ذِكرك طَيِّب أفعالكْ

حياة غيرك ما تقدَر تغَيِّرها

عليك نفسك واهلك واحفَظْ اعيالكْ

وكِنْ قدوة إلهُم بافعالك تسَطِّرها

واسلِكْ طريق الشَّهامة تنجَح آمالك

وَإِنْ شفت أهل المعاير لا تعَيِّرها

إذا تعَيِّب بعَيب بغَفلةٍ جالِك

مطِيَّة الوَقت كم ترمَح مضَمِّرها

ودنياك تِكدَر وبعض أحيان تصفالِك

خُذها بدوب وسهولَة لا تعَسِّرها

وابخَلْ بعِرضك وارخَصْ بالسِّخَى مالِك

ما يحاسِب الله على النِّيِّة ويَظْهِرها

اللهْ بعَدلِه ترىَ يحاسب على أعمالِك