كلمات أغنية الصحاب - زاب ثروت | El Sohab Lyrics - Zab Tharwat
زمان بس مش زمان ألف ليلة و ليلة
زمان وقت الطفولة الحلوة و أيامنا الجميلة
كان عمري عشرة اتناشر مش أكتر من كدة
عرفت كريم صديقي اللي من أيام الصِبا
اخوات مش اصحاب يمكن تقول علينا
يفرقنا بس الشكل و الاختلاف اللي في أسامينا
نفس حب الكورة فينا و لعبها اللي بالساعات
هتلم فرقة هلم فرقة و نلعب علي التيشرتات
ياما في مدخل العمارة سهرنا علشان الوقت اتأخر
و الصبح للأتاري اليوم في ثانية كان يتبخر
في الشتا كنا نتقابل بعد خروج المدرسة
تكمل العصابة بينا و ننزل تاني علي العشا
في اللي منا هادي عاقل و اللي صوته عالي هيصة
و اللي مَلُهْش في المشاكل و اللي خناقاته عويصة
و اللي من صحابنا بعدوا عشان سجارة جديدة غير
لفوا مهما لفوا تاهوا رجعوا لان ملكش غير
كشك عبده كان مجمع جمبه من الحبايب ألف
كنا كتير و ما حد غايب و اللي يغيب اكيد في ظرف
في الفرح دايماً جماعة و مينقصش منا واحد
في العزا تلقانا صف كتف في كتف و ضهر واحد
الزعل ما بينا نادر كلمة آسف كانت تدوِّب
اي خصام مابينا كان و جمب اخويا اياك تهوب
ايوة عيلة بدون روابط الأُسَر و القرايب
اختك اختي و اهلك اهلي في وجودك او كنت غايب
صُحاب أصلية فقرية دماغهم مُشكلة
رجولة و مية مية دول عِشْرة قديمة مكملة
لو فين أراضينا حاسين ببعضينا
كِبْرت وشوش بس القلوب جدعان متغيروش
عايز احكيلكم عالسعادة و الايام الحلوة بينا
البوم عمرو في المعمورة قبل راس سدر و مارينا
العربية حمولة خمسة بس راكب فيها سبعة
بنسافر الصبح بدري و بنرجع بالعافية في تسعة
الحكاوي قبل نومنا نفضل باليومين صاحيين
الشاليه لو اوضة واحدة عادي يكفي اربعين
فرقت الجامعة بينا باختلاف مواعيدنا
وةاتخرجنا بسرعة منها بس كنا خلاص بِعِدنا
صوت الجيش عمال ينادي اللي داخل و اللي أجِّل
و اللي أخد الإعفا دُغري و لمعاد الفيزا سجل
كبرت الدنيا علينا و المكالمة بالمعاد
اصل فلان هاجر لكندا و فرق التوقيت بالساعات
هما اتنين تلاتة بقيوا في الوصال و الاتصال
و نقول الدنيا تلاهي و كل واحد حاله حال
و في يوم ابويا تعب كنت هموت من الخوف عليه
القدر يعمي البصر طب هتصرف اعمل ايه
فكلمت اول نمرة من صحابي كنت فاكرها
حس بيا و اللي فيا من مكالمة وفي اولها
و نص ساعة و كان تلاتة من صحابي قصادي جُم
زادوا اكتر بعد ساعة ايوة دول صحابي اهُم
و رجعنا تاني صف واحد كتف في كتف و ضهر واحد
كل اخواتي كانوا جنبي و منقصش منا واحد
قام ابويا بعدها كانوا سندي وقتها
و الحكاية دي حقيقة و الله ما ألّفتها
صُحاب أصلية فقرية دماغهم مُشكلة
رجولة و مية مية دول عِشْرة قديمة مكملة
لو فين أراضينا حاسين ببعضينا
كِبْرت وشوش بس القلوب جدعان متغيروش
0 تعليقات
أخبرنا رأيك👇😃